Републичкиот совет за безбедност на сообраќајот на патиштата (РСБСП), во соработка со Отсекот за превенција при СВР Велес , на 12 октомври (недела) со својот карван на безбедност во сообраќајот беше во Велес на третиот ден од манифестацијата „Фестивал на пита и вино – Питијада 2025“. Едукативниот инфо-штанд беше дел на изложбата на олд-тајмер автомобили и предизвика голем интерес кај бројните посетители.
На штандот на РСБСП беа претставени едукативни материјали, флаери и препораки за подигнување на сообраќајната свест кај возачите, пешаците и најмладите учесници во сообраќајот. Голем интерес покажаа родителите заедно со најмладите посетители, за кои беа поделени едукативни материјали за сообраќајните правила и прописи прилагодени на нивната возраст, се со цел да се едуцираат за правилно и безбедно однесување во сообраќајот.
Во рамки на настанот беа опфатени актуелните кампањи на РСБСП: „Стави појас“, „Не пиј кога возиш“, „Не користи мобилен телефон кога возиш“, „Паркирај совесно – Паркирај одговорно“, „Безбедноста на пешаците – одговорност на сите нас“, „Безбедно на мотор“, „Безбедно на е-тротинет“ и „Безбедно на велосипед – Заврти на сигурно“, наменета кон велосипедистите, како и кампањата „Безбедно во сообраќајот со трактор и земјоделска механизација“.
Теренските активности на Советот заеднички со партнерите во кампањата и МВР секогаш се предмет на голем интерес од учесниците во сообраќајот и граѓаните, од кои дел прв пат се запознаваат со сообраќајните правила и прописи, а останатите имаат можност да се потсетат дека безбедноста е заеднички придонес на сите учесници во сообраќајот. Во таа насока, РСБСП продолжува со своите активности на терен под слоганот #РСБСПнаТерен со ефективна цел менување на навиките кај учесниците во сообраќајот преку едукација и зголемување на сообраќајната свест и култура преку превенција од сообраќајни незгоди, со цел создавање побезбедни патишта за сите учесници.
