РСБСП карванот на безбедност во сообраќајот во Кавадарци како дел од „Тиквешки гроздобер 2025“

Републичкиот совет за безбедност на сообраќајот на патиштата (РСБСП), во соработка со Општинскиот совет за безбедност на сообраќајот од Кавадарци, МВР Отсекот за превенција при СВР Велес и полициските службеници од ОВР Кавадарци, на 7 септември (недела) со својот карван на безбедност во сообраќајот беше во Кавадарци на вториот ден од манифестацијата „Тиквешки гроздобер 2025“. Едукативниот инфо-штанд беше на изложбата на олд-тајмер автомобили и предизвика голем интерес кај бројните посетители.

На штандот на РСБСП беа промовирани едукативни материјали, флаери и препоораки за подигнување на сообраќајната свест кај возачите, пешаците и најмладите учесници во сообраќајот. Посебен интерес покажаа најмладите посетители, за кои беа поделени едукативни материјали за сообраќајните правила и прописи прилагодени на нивната возраст, се со цел да се едуцираат за правилно и безбедно однесување во сообраќајот.

Преку практична демонстрација со едукативното средство „пијани наочари“, граѓаните имаа можност директно да почувствуваат како изгледа кога се под дејство на алкохол и да ги увидат последиците од ваквото ризично однесување. Оваа активност наиде на огромен интерес кај посетителите и ја нагласи пораката за одговорно и совесно учество во сообраќајот.

Во рамки на настанот беа опфатени актуелните кампањи на РСБСП: „Стави појас“, „Не пиј кога возиш“, „Не користи мобилен телефон кога возиш“, „Паркирај совесно-Паркирај одвоворно“, „Безбедноста на пешаците-одговорност на сите нас“, „Безбедно на мотор“, „Безбедно на е-тротинет“ и „Безбедно на велосипед – Заврти на сигурно“ наменета кон велосипедистите.

РСБСП продолжува со своите активности во насока на зголемување на сообраќајната свест и култура преку превенција од сообраќајни незгоди, со цел создавање побезбедни патишта за сите учесници.