На работниот состанок помеѓу Претседателот на Собранието на Република Северна Македонија, Талат Џафери и претседателката на РСБСП, Гордана Кожуваровска беше презентирана Програмата за работа на Советот за 2022 година. На состанокот присуствуваа и секретарот на РСБСП, Владимир Лазаров и членот Вјолца Бајрами.
Претседателката на Советот ја образложи Програмата за работа на РСБСП за 2022 година, која се состои од голем број на сообраќајно – едукативни кампањи, настани од едукативно-образовен карактер, научно-истражувачки активности, изработка на стручна и едукативна литература, организација на едукативни трибини, предавања, стручни собири, тркалезни маси, организација и учество на домашни и меѓународни конференции, работилници, обуки, продукција и емитување на едукативни видео материјали за сообраќајот, едукативно дејствување преку социјалните мрежи, електронските и пишаните медиуми.
Главната цел на РСБСП и во 2022 година е унапредување на безбедноста на сообраќајот на патиштата и намалување на бројот на загинати и повредени лица во сообраќајни незгоди. Истата се очекува да се постигне преку интензивна соработка и заедничко дејствување со сите надлежни институции, во прв ред со МВР, и преку целосна реализација на предвидените активности.
Републичкиот совет за безбедност на сообраќајот на патиштата е советодавно тело на Собранието на Република Северна Македонија кое функционира заради унапредување на безбедноста на сообраќајот на патиштата.
Покрај основните задачи за унапредување и развивање на сообраќајното образование, воспитание, култура и етика кај сите учесници во сообраќајот на патиштата, РСБСП ја извршува и функцијата на еден од главните иницијатори за имплементација на мерки за подобрување на безбедноста на сообраќајот на патиштата и координатор при дејствувањето на повеќе надлежни субјекти.
Заклучок од состанокот е дека улогата на РСБСП како институција е континуирано залагање за подигнување на сообраќајната свест, култура и етика на сите учесници во сообраќајот. Градењето еден ваков систем на општествени вредности е најсилниот инструмент за долгорочно подобрување на безбедноста на сообраќајот на патиштата, а со тоа и трајно намалување на последиците од сообраќајните незгоди.