Искуството од минатите години, покажа дека РСБСП и МВР се пример за позитивна и успешна меѓуинституционална соработка и поддршка која ќе продолжи и во наредниот период на сите ниво и во повеќе области.
Едукативно превентивните кампањи, кои заеднички ги реализираа РСБСП и МВР во изминатиот период, поддржани со засилени конторли од страна на сообраќајната полиција, придонесоа за намалување на бројот на сообраќајни незгоди во 2020 година.
Соработката помеѓу РСБСП и МВР е заедничка цел и законска обврска на двете институции и ваквиот пристап на работа ќе продолжи да се надоградува и во иднина.
Согласно тоа и согласно член 374, став 2 од од Законот за безбедност на сообраќајот на патиштата, РСБСП, дел од своите средства ги наменува за модернизација на опремата на сообраќајната полицијата. Во таа насока, на ден 08.01.2021 година, беше презентирана и предадена во трајна сопственост на МВР, опрема која ја набави РСБСП, а за која Министерството за внатрешни работи ценеше дека ќе им биде потребна за унапредување на контролата на патниот сообраќај и унапредување на работата на сообраќајната полиција.
Станува збор за 15 моторцикли, марка PIAGGIO Beverly 300, со година на производство 2020. Покрај тоа, набавена е и комплетна дополнителна опрема за моторциклите, а набавени се и 15 комплети заштитна опрема за мотоциклисти и тоа: заштитни шлемови – кациги, и заштитно одело- панталони, јакни, чизми и летни и зимски ракавици.
„Примената на современа техничка опрема во процесот на управување и контрола на сообраќајот на патиштата значително ќе ја зголеми ефикасноста на работата на сообраќајната полиција и ќе го зголеми обемот и квалитетот на извршените контроли и проверки од страна на сообраќајната полицијата.
Континуираното унапредување на работата на сообраќајната полиција и подобрување на нејзините капацитети е од исклучителна важност за подобрување на безбедноста на патниот сообраќај“ – потенцира Претседателот на РСБСП Гордана Кожуваровска по повод предадената опрема на МВР.
“Задоволство ми е во име на Министерството за внатрешни работи на Република Северна Македонија и во мое лично име да изразам благодарност до Републичкиот совет за безбедност на сообраќајот на патиштата за опремата обезбедена за зајакнување на капацитетите на надлежните сообраќајни единици во МВР ,- рече министерот за внатрешни работи, Оливер Спасовски при преземањето на опремата наменета за потребите на сообраќајната полиција.
Министерот Оливер Спасовски и Претседателот на РСБСП, Гордана Кожуваровска изразија задоволство од остварената соработка и потенцираа дека единствено преку високо ниво на соработка и поддршка помеѓу сите надлежни институции, Република Северна Македонија ќе ја издигне безбедноста на сообраќајот на патиштата на ниво на земјите членки на Европската унија, а тоа би значело помалку сообраќајни незгоди и помалку настрадани лица во сообраќајни незгоди.