Во просториите на Факултетот за безбедност – Скопје беше одржана јавна дебата „Безбедноста на пешаците – одговорност на сите нас“, по повод Недела на пешаците во организација Републичкиот совет за безбедност на сообраќајот на патиштата во соработка со Министерството за внатрешни работи и Факултетот за безбедност.
На дебатата учество земаа експерти од областа на сообраќајот и претставници на надлежни институции, а свое обраќање имаа претседателот на РСБСП, м-р Горан Ангеловски, министерот за внатрешни работи Панче Тошковски, како и деканот на Факултетот за безбедност – Скопје, професор д-р Јонче Ивановски
Личната одговорност, свест и совест, сообраќајната култура и толеранција и доследно почитување на сообраќајните правила и прописи од страна на секој учесник во сообраќајот е единствениот начин да се намали бројот на загинати и повредени лица во сообраќајни незгоди. Во спротивно, за жал, порано или подоцна, директно или индиректно ќе ги почувствуваме последиците од неодговорното учество во сообраќајот. Безбедноста на пешаците е заедничка одговорност. На крајот, важно е да истакнеме дека безбедноста на пешаците не е само проблем на институциите, туку на сите нас како граѓани.
– истакна претседателот на РСБСП, м-р Горан Ангеловски.
На дебатата беа презентирани мерки за унапредување на безбедноста на пешаците во сообраќајот, од различни аспекти – образование подобрување на сообраќајната инфраструктура, засилени контроли од надлежните институции и подигнување на свеста и одговорноста на граѓаните како учесници во сообраќајот
