Републичкиот совет за безбедност на сообраќајот на патиштата (РСБСП), во соработка со Министерството за внатрешни работи, ОСБСП и останатите партнери, на 15 ноември 2026 година го одбележа Светскиот ден на сеќавање на жртвите од сообраќајни незгоди.
Централниот настан се одржа во Градскиот парк во Скопје, на кој присуствуваа претставници на институциите, академската заедница, граѓанскиот сектор и голем број граѓани, кои заеднички оддадоа почит на жртвите во сообраќајни незгоди и упатија порака за поголема одговорност и безбедност во сообраќајот.
Во своето обраќање, претседателот на РСБСП, м-р Горан Ангеловски, истакна дека зад секоја статистика стојат човечки судбини и семејства кои засекогаш живеат со последиците од една сообраќајна незгода.
„Овој ден не е само ден на сеќавање, туку и повик за заедничка акција. Секој живот изгубен на патиштата е потсетник дека безбедноста во сообраќајот мора да биде приоритет на сите нас. Само преку едукација, превенција, одговорно однесување и институционална соработка можеме да создадеме побезбедни патишта и да спасиме човечки животи”, истакна Ангеловски.
На одбележувањето беше нагласено дека бројот на жртви во сообраќајни незгоди во Република Северна Македонија бележи намалување, при што во 2025 година животот на патиштата го загубиле 132 лица, наспроти 142 лица во 2024 година, а во првите десет месеци од 2026 година се бележи тренд на намалување на бројот на загинати од околу 25%.
Иако овие податоци претставуваат позитивен исчекор, тие истовремено потсетуваат дека секој изгубен живот е неприфатлива загуба која бара континуирани напори за подобрување на безбедноста во сообраќајот.
Во рамките на настанот, симболично беа пуштени балони со бројот 132, кој го претставува бројот на загинати лица во сообраќајни незгоди во текот на 2025 година, а беше реализиран и симболичен марш низ Градскиот парк во чест на сите оние кои ги загубиле своите животи на патиштата.
На присутните граѓани им беа поделени превентивно-едукативни материјали со пораки за одговорно однесување во сообраќајот и почитување на животот како највисока вредност.
Во реализацијата на настанот активно учество зедоа и учениците од сообраќајната секција на АСУЦ „Боро Петрушевски” – Скопје.
Одбележувањето на Светскиот ден на сеќавање на жртвите од сообраќајни незгоди претставува потсетник дека безбедноста во сообраќајот е заедничка одговорност на институциите, возачите, пешаците, велосипедистите и сите други учесници во сообраќајот.
РСБСП апелира: Да се сеќаваме, но и да делуваме. Да градиме култура на одговорност, почит и безбедност во сообраќајот, затоа што секој живот е важен. 💟🚦