ИЗВЕСТУВАЊЕ ЗА ВОВЕДУВАЊЕ НА ЛЕТЕН ВРЕМЕН РЕЖИМ НА СООБРАЌАЈ ЗА ТЕШКИ ТОВАРНИ ВОЗИЛА НА ДРЖАВНИТЕ ПАТИШТА
Со цел унапредување на безбедноста на сообраќајот, обезбедување непречен проток на возилата во периодот на зголемена летна фреквенција, како и заштита на патната инфраструктура од оштетувања предизвикани од екстремно
високите температури, во периодот од 1 јули до 31 август се воведува летен времен режим на сообраќај на државните патишта во Република Северна Македонија.
Согласно утврдениот режим, се воведува времена забрана за движење на тешки товарни возила со вкупна дозволена маса над 15 тони, за време на викендите, како и во денови со екстремно високи температури, во следните временски
интервали:
петок: од 17:00 до 22:00 часот;
сабота: од 09:00 до 18:00 часот;
недела: од 09:00 до 22:00 часот.
Дополнително, на магистралниот пат А2, делница Скопје – Охрид – Скопје, се применува посебен режим на сообраќај, при што е забрането движење на товарни возила со вкупна дозволена маса над 7,5 тони, во следните термини:
петок: од 15:00 до 22:00 часот;
сабота: од 07:00 до 12:00 часот и од 18:00 до 24:00 часот;
недела: од 07:00 до 22:00 часот.
Републичкиот совет за безбедност на сообраќајот на патиштата апелира до сите правни и физички лица кои вршат транспортна дејност, како и до возачите на тешки товарни возила, доследно да го почитуваат утврдениот времен режим на сообраќај, навремено да ги планираат транспортните активности и целосно да постапуваат согласно ограничувањата.
Почитувањето на овие мерки претставува значаен предуслов за намалување на сообраќајните ризици, зголемување на безбедноста на сите учесници во сообраќајот, зачувување на патната инфраструктура и обезбедување побезбедно
и поефикасно одвивање на сообраќајот во периодот на летната туристичка сезона.
Безбедноста во сообраќајот е заедничка одговорност – почитувањето на сообраќајните правила и ограничувања значи заштита на човечки животи.