Републичкиот совет за безбедност на сообраќајот на патиштата во периодот од 29.9.2016 година до 1.10.2016 година, во хотелот Александар Палас, во Скопје, ќе ја организира првата Меѓународна Конференција за безбедност во сообраќајот во земјите од Југоисточна Европа, насловена како „Управување со безбедноста на патниот сообраќај во Југоистична Европа-предизвици и насоки за дејствување“.
На истата ќе присуствуваат првите луѓе на националните тела за унапредување на безбедноста во сообраќајот на патиштата од земји од регионот: Македонија, Србија, Косово, Хрватска, Словенија, Грција, и други земји од регионот.
На огромно задоволство на РСБСП, како гостин и предавач ќе се обрати истакната претседателка на грчкиот Институт за безбедност на патиштата „Панос Милонас“, м-р Василики Данели-Милона, од Република Грција. Нејзиното искуство како менаџер и координатор на големи проекти за унапредување на безбедноста на сообраќајот на патиштата, е од исклучиво значење, а од особена важност е и нејзиното членство во Националниот комитет за безбедност на патиштата во Грција, каде што котира високо како работен профил и има постигнато повеќе национални и меѓународни награди за достигнувања од областа на безбедноста на патиштата.
Освен г-ѓа Милос, на конференцијата ќе земат учество и други реномирани универзитетски професори од земјите во регионот, претставници на водечките тела за безбедност во сообраќајот на патиштата, преставници од МВР, сообраќајни инженери, претставници од Град Скопје и други.