Во рамки на Европската недела на мобилност, Републичкиот совет за безбедност на сообраќајот на патиштата (РСБСП), покрај останатите активности, учествуваше на Меѓународната конференција за одржлива мобилност. На конференцијата, РСБСП имаше свое излагање преку презентација на тема: „Добри сообраќајни практики на урбаната мобилност во Македонија и Европската Унија“.
Во својата презентација, Советот се осврна на досегашните активности и кампањи насочени кон унапредување на урбаната мобилност и зголемување на безбедноста на сите учесници во сообраќајот. Притоа, посебен акцент беше ставен на кампањите Безбедно со велосипед #ЗавртиНаСигурно“, чија цел е подигнување на свеста за безбедноста на велосипедистите, како и „#БезбедноНаТротинет“, насочена кон едукација и одговорно однесување на возачите на електрични тротинети.
Дополнително, РСБСП информираше дека негови членови активно учествуваат во работната група за измени и дополнувања на Законот за безбедност на сообраќајот на патиштата, како и во координативното тело за изготвување на новата Национална стратегија за безбедност на сообраќајот и Националната стратегија за одржливост на патиштата.
Во рамките на дискусијата, беше потенцирано значењето на совесното и безбедно управување со електрични тротинети и велосипеди – со задолжително носење заштитна опрема, почитување на пропишаната брзина и користење исклучиво на обележани велосипедски патеки, а не на коловозни ленти.
Со своето активно учество на конференцијата, РСБСП уште еднаш ја потврди својата посветеност кон промовирање на одржлива и безбедна урбана мобилност, во согласност со европските практики и насоки.
