Во вторникот на 12.04.2022 година, претседателката на РСБСП, Гордана Кожуваровска се сретна со министерката за труд и социјална политика Јованка Тренчевска. На средбата присуствуваше и секретарот на РСБСП, Владимир Лазаров. На истата се разговараше за досегашната соработка и за активностите кои се планираат со најмалите дечиња од предучилишните установи.
Претседателката на Советот ја запозна Министерката со кампањите кои се реализираат во градинките, согласно Програмата за работа на РСБСП за 2022 година. Предвидени се голем број на сообраќајно-едукативни настани, предавања, емитувања на едукативни видеа и филмови, специјално прилагодени за најмалата категорија учесници во сообраќајот. За дечињата се обезбедени боенки, сликовници, флаери и друг едукативен материјал со содржини од безбедноста на сообраќајот. Во тек е кампањата ,,Младите пешаци”, каде со предавања, презентации и делење на брошури се опфатени најголемиот дел од градинките во државата.
Претседателката потенцира дека главната цел на РСБСП и во 2022 година е унапредување на безбедноста на сообраќајот на патиштата и намалување на бројот на загинати и повредени лица во сообраќајни незгоди, вклучувајќи ги тука и децата. Очекувањата се да се постигне интензивна соработка и заедничко дејствување на сите надлежни институции се со цел, целосна реализација на предвидените активности.
Министерката Тренчевска го поздрави залагањето на РСБСП во сферата на едукација на децата во предучилишните установи и ја истакна отвореноста за соработка и поддршката која РСБСП ја има од Министерството за труд и социјална политика за унапредување и развивање на сообраќајното образование, воспитание, култура и етика. Сето тоа води кон долгорочно подобрување на безбедноста на сообраќајот на патиштата, а со тоа и трајно намалување на последиците од сообраќајните незгоди.