Изминативе неколку години, значително е зголемен бројот на моторни возила. Забележлива е нивна зголемена фрекфенција, особено во градските средини, а со тоа зголемен е и сообраќајниот метеж, па многупати справувањето со метежот и управувањето моторно возило претставува вистинска уметност. Републичкиот совет за безбедност на сообраќајот на патиштата, овој пат, фокусот го става на мотоциклистите, независно од големината и кубикажата на мотоциклот со кој управуваат. Како и за другите учесници во сообраќајот, така и за нив, важат правила, кои доколку ги почитуваат, веројатноста да настрадаат во сообраќајна незгода се сведува на минимум.
Основните правила за секој мотоциклист се следниве:
- Носете заштитен шлем (кацига)
- Внимавајте на брзината
- Користете ги трепкачите
- Одржувајте растојание
- Користете ги двете сопирачки
- Избегнувајте „мртви агли“
- Носете рефлектирачки елек и заштитна опрема
Кога се движите меѓу две или повеќе возила, во колона или пак, треба да застанете на семафор, следете ги овие правила:
- Правилно е да заземете свое место во лентата, зад возилото кое е пред вас
- Доколку сакате да го поминете, движете се по левата страна, со тоа што ќе внимавате да не ги прегазите линиите и да преминете на спротивната лента
- Држете растојание со возилото пред вас (доколку стои или треба да застане), дајте му знак со трепкач на возилото зад вас и избегнете да ве стават во „сендвич“, или да ве „сплескаат“
- Привлечете дополнително внимание со кратко притискање и отпуштање на кочницата, односно со трепкање на стоп светлото
Според Законот за безбедност на сообраќајот на патиштата, секој возач на мотоцикл треба да се придржува до следниве правила:
- Движењето во група треба да биде еден позади друг
- Возачот и лицата кои се превезуваат со мотоцикл, задолжително носат заштитен шлем на главата за време на возењето на патот
- За вклучување на јавен пат или на друга сообраќајна површина, кога мотоциклистот се вклучува во сообраќајот од гаража, двор или друга слична површина, ако видикот му е закриен со друго возило, објект или предмет или ако видливоста му е намалена возачот на мотоцикл тоа треба да го направи со туркање, а не со возење
- Возачот на мотоцикл не смее со мотоциклот со кој управува да преминува преку пешачки премини и пешачки патеки, а со тоа и да ја загрозува безбедноста на пешаците
- Возачот на мотоцикл не смее да биде под дејство на алкохол или да превезува лице кое е под дејство на алкохол
- Возачот на мотоцикл не смее да превезува дете помало од 12 години
- Возачот на мотоцикл не смее да пренесува предмети пошироки од еден метар
- Возачот на мотоцикл е должен да управува со возилото на начин на кој не се намалува стабилноста на возилото и не се попречуваат другите учесници во сообраќајот, а особено не смее да ги симнува рацете од управувачот, да се придржува за друго возило, да превезува, влече или турка предмети што можат да го попречуваат во управувањето со возилото или да ги загрозуваат другите учесници во сообраќајот
- Полицискиот службеник на самото место привремено ќе му ја одземе возачката дозвола и ќе го исклучи од сообраќај возачот на мотоцикл кој управува со мотоцикл без заштитен шлем , и кога лицата кои се превезуваат не носат или одбиваат да носат заштитен шлем за време на возењето на патот
Во член 301, став 2, 3, 4, и 5 од Законот, се наведени категориите по кои се поделени мотоциклите, според намената и работната зафатнина на моторот.