Сигурносниот појас е многу повеќе од само револуционерен изум во возилата, тоа е уред кој секојдневно спасува илјадници животи на патишата во Македонија и ширум светот. Носењето на појас кога управувате со автомобилот е всушност инвестиција во вашето здравје, сигурност и иднина – иднина полна со нови доживувања со саканите и блиските, иднина со уште бројни безбедни километри уживајќи во животот – живот кој нема цена.
Токму ова е главната водилка на Републичкиот совет за безбедност на сообраќајот на патишатата, започнувајќи ја новата кампања под мотото #СтавиПојас во чиј фокус е подигнување на свеста кај учесниците во сообраќајот и намалување на повредите во сообраќајни незгоди со потешки последици, кои може значително или целосно да бидат анулирани со носење на сигурносен појас.
Во таа насока, во следниот период, РСБСП ќе делува превентивно и едукативно на возачите и сопатниците на различни начини. За потребите на кампањата се изработени едукативни материјали, кои во рамки на спроведување на кампањата ќе бидат поделени на учесниците во сообраќајот.
Кампањата ќе се реализира на територијата на цела држава, преку непосредно учество на терен на РСБСП, електронски во медиумите и социјалните мрежи, а целна група ќе бидат возачите и патниците како учесници во сообраќајот.
Потсетуваме дека согласно Законот за безбедност на сообраќајот на патиштата налага возачот на моторно возило во кое се вградени сигурносни појаси и лицата кои се превезуваат со тоа возило, се должни да бидат врзани со тие појаси на начин утврден од производителот на возилото, за време додека возилото се движи во сообраќајот на пат.
Потсетуваме дека одредбите од Законот за безбедност на сообраќајот на патишта предвидуваат дека покрај возачот и сопатникот на предните седишта, подеднаква обврска за носење сигурносен појас имаат и лицата кои се превезуваат на задните седишта во возилото. Исто така, напоменуваме децата кои имаат помалку од пет години треба да бидат во детско седиште, врзани со сигурносниот појас од детското седиште.
Законот предвидува глоба за неносење на сигурносен појас и тоа 40 евра во денарска противвредност за возачот кој управува со возилото, како и 50 евра во денарска противвредност за лицето кое се превезува во возилото.
Сепак, казните се само парична вредност, а животот и безбедноста немаат цена, токму затоа заради лична безбедност и безбедност на патниците во возилото, секогаш, при секое патување користете сигурносен појас.
РСБСП упатува порака: Не заборавајте – сигурносниот појас спасува живот, затоа #СтавиПојас и #ВозиОдговорно!