По повод 11 мај Меѓународниот ден на сообраќајната култура, на 9 мај 2025 година, на Техничкиот факултет при Универзитетот „Св. Климент Охридски“ – Битола се одржа трибина посветена на значењето на сообраќајната култура и унапредувањето на безбедноста на патиштата.
Настанот беше организиран во соработка со катедрата за сообраќај при Факултетот, а свои излагања имаа истакнати претставници од институциите кои работат на полето на безбедноста во сообраќајот. На трибината се обратија помошник командирот во ПС за безбедност на сообраќај Битола, началникот од отсекот за превенција при СВР Битола, проректорите – Професор Јасмина Буневска-Талевска и Професор Зоран Јошевски, воедно и член на РСБСП, како и претседателот на Републичкиот совет за безбедност на сообраќајот на патиштата 🚗🚶🚲🏍
Во своето обраќање, Ангеловски потенцира дека сообраќајната култура не е само збир од правила и прописи, туку одраз на општествените вредности и личната одговорност. Тој истакна дека идните инженери и проектанти, какви што се студентите од техничките и сообраќајните факултети, имаат клучна улога во изградбата на безбедна и одржлива сообраќајна инфраструктура, и ги повика да ги имплементираат принципите на безбедност и култура во секој аспект од својата работа.
„Нашата заедничка мисија е да изградиме генерации што ќе го разберат сообраќајот не како натпревар, туку како заеднички простор на трпение, почит и одговорност“, истакна Ангеловски.
Тој додаде дека РСБСП останува посветен на соработката со академската заедница преку едукативни и превентивни активности, кои ќе придонесат за промена на сообраќајната реалност во земјата.
Настанот заврши со повик до сите учесници во сообраќајот да бидат внимателни и одговорни, бидејќи сообраќајната култура е предуслов за намалување на незгодите и заштита на човечките животи.
