Од почетокот на 2016 година, Републичкиот совет за безбедност на сообраќајот на патиштата, стана полноправен член на Европскиот совет за безбедност во сообраќајот (ETSC), што значеше и отпочнување на нова ера во соработката на меѓународно ниво.
Една од главните цели за зачленување во ETSC беше размена на информации со европските земји во однос на безбедност на сообраќајот на патиштата, компарација со нашата состојба, спроведување заеднички мерки и активности за подобрување на безбедноста на патиштата, и секако, намалување на бројот на сообраќајни незгоди, а со тоа и намалување на бројот на жртви и сериозно повредени лица.
Видеото кое може да се погледне е наменето за користење безбедносен појас во возилата, на ниво на ЕУ и е една од заедничките активности кои ги реализираме, а според статистичките податоци, стапката на некористење безбедносен појас на предните седишта е 10%, а на задните седишта 25%. ЕУ ова го смета за „сериозен проблем“, но во споредба со Република Македонија, за жал, стапката на некористење на безбедносни појаси кај нас е многу поголема, а со тоа и ризикот учесниците во сообраќајот да бидат тешко повредени, или пак, сообраќајните незгоди да бидат со смртни последици е навистина голем.
Во таа насока, во изминативе неколку години, технологијата наречена Intelligent seat bell reminders (Паметни потсетници за безбедносни појаси) сè повеќе се вградува во производството на новите автомобили и сè повеќе е дел од задолжителната стандардна опрема на истите. Оваа технологија ги поттикнува возачите и совозачите задолжително да ги користат своите безбедносни појаси, која во спротивно, доколку не ги користат, постојано сигнализира преку светлосен и звучен сигнал, а во одредени понапредни верзии, не дозволува движење на возилото со поголема брзина.
Се надеваме видеото ќе ве поттикне во иднина повеќе да го користите безбедносниот појас, како на предните, така и на задните седишта. Само за потсетување, согласно новиот Закон за безбедност на сообраќајот на патиштата (член 23), некористење безбедносен појас е казниво, и тоа 40 евра во денарска противвредност за возачот и 50 евра во денарска противвредност за совозачот/ите.