По повод кампањата за одбележувањето на Светскиот ден за сеќавање на жртвите во сообраќајни незгоди, Републичкиот совет за безбедност на сообраќајот на патиштата, продолжува со активности за подигнување на јавната свест за фаталните последици од непочитувањето на сообраќајните правила и прописи.
Со цел намалување на бројот на загинати и на повредени во сообраќајни незгоди, преку едуцирање на младите за штетното влијание на алкохолот и на психотропните супстанции врз нивната способност за управување со моторно возило, денес беа организирани сообраќајно-едукативни работилници со студентите од „Американ колеџ“ и „МИТ Универзитет“. Во рамките на работилницата со свои предавања се вклучија и претставници од АМСМ кои со помош на таканаречените „Пијани очила“ практично им покажаа на студентите каква е нивната перцепција и физичка способност кога се под дејство на алкохол и психотропни супстанции. Посебен акцент ставија на текстирањето и употребата на мобилните телефони, смартфони и други електронски уреди и нивното влијание врз безбедното управување со моторно возило.
Со оддавање почит на една од најголемите македонски музички ѕвезди, а со цел уште еднаш да потсетиме дека сообраќајните незгоди се случуваат секому, секаде и во секое време и повторно да повикаме за повисоко ниво на одговорност во сообраќајот, претставници од Републичкиот совет за безбедност на сообраќајот на патиштата и претставници од општина Крушево, заедно со голем број деца и родители од Крушево и Кривогаштани, на 18 ноември (четврток) го посетија вечното почивалиште и спомен музејот на Тоше Проески. При посетата, покрај испратените искрени, детски пораки за внимателно однесување во сообраќајот, беа запалени и 124 свеќи во форма на срциња кои ја симболизираат неизмерната лубов кон Тоше и кон сите оние кои оваа година го загубија животот во сообраќајни незгоди.