Претседателот на Републичкиот совет за безбедност на сообраќајот на патиштата Стојче Стаменковски и градоначалникот на Охрид Никола Бакрачески денес на заедничката прес-конференција која се одржа во просториите на Општината, го означија почетокот на засилената заедничка соработка во процесот на унапредување на сообраќајно превентивното дејствување на локално ниво.
Согласно тоа, Републичкиот совет за безбедност на сообраќајот на патиштата донираше одбројувачи за семафори (лантерни) кои во наредниот период ќе бидат поставени на повеќе фрекфентни крстосници во Охрид и ќе имаат за цел да го регулираат сообраќајот на пешаците.
-Високите температури, сообраќајниот метеж се карактеристични за овој период од годината особено за туристички центри како Охрид. Ваквите состојби често пати создаваат нервоза и нестрпливост кај учесниците во сообраќајот посебно кај пешаците. Затоа сметаме дека инсталирањето на ваква сообраќјна опрема значително ќе придонесе за подобрување на безбедноста на пешаците во сообраќајот, истакна Претседателот на РСБСП Стојче Стаменковски, истовремено апелирајќи и до останатите учесници во сообраќајот да бидат внимателни и одговорни во сообраќајот, да ги почитуваат сообраќајните правила и прописи а особено да внимаваат на правилата за ограничување на брзината и да не управуваат моторно возило под дејство на алкохол.
Градоначалникот на Охрид го истакна своето задоволство од остварената соработка и притоа потенцираше дека во иднина Општината ќе вложи поголеми напори за подобрување на протечноста и безбедноста во сообраќајот во градот Охрид и подигање на сообраќајната култура на едно повисоко ниво.
На заедничката средба и двете страни истакнаа дека безбеден сообраќај за сите учесници во сообраќајот е заедничка и приоритетна цел и дека соработката ќе продолжи и во иднина со засилени и темелни активности. Во таа насока а со цел обезбедување на безбеден и протечен сообраќај, Републичкуиот совет за безбедност на сообраќајот на патиштата ќе донира светлосни сообраќајни знаци – семафори.
Во наредниот период РСБСП во соработка со Општината, Општинскиот совет за безбедност на сообраќајот на патиштата и МВР ќе реализираат повеќе заеднички активности со цел намалување на бројот на загинати и повредени лица во сообраќајни несреќи.
Засилување на улогата на локалната самоуправа во процесот на унапредување на безбедноста на сообраќајот на патиштата претставува една од приоритетните цели дефинирани во Втората национална стратегија, за што општина Охрид и денешниот настан преставуваат вистински позитивен пример.