Почетокот на училишната година по правило значи поголем сообраќаен метеж, зголемена фрекфенција на пешаци во сообраќајот а со самото тоа се наметнува потребата за поголема внимателност и одговорност на сите учесници во сообраќајот. Токму затоа, РСБСП апелира до возачите:
- Во близина на училиште или градинка бидете двојно повнимателни, намалете ја брзината, и следете го внимателно движењето на децата во околината на улицата. Секогаш имајте на ум дека децата се крајно непредвидливи и може во секој момент да се одлучат да ја претрчаат улицата.
- Посебно бидете внимателни на пешачки премин. Намалете ја брзината навреме, и благовремено застанете и препуштете ги пешаците. Особено внимавајте на децата.
- Возачите секогаш треба да имаат на ум дека децата не размислуваат за опасностите на патот и не се во состојба да ја проценат брзината со која се движат возилата.
- Секогаш држете безбедно растојание помеѓу возилата и бидете предвидливи во однесувањето во сообраќајот на тој начин ќе придонесете за поголема безбеност на сите учесници во сообраќајот вклучително и децата.
- Однесувајте се дефанзивно во сообраќајот затоа што само на тој начин ќе бидете во состојба да ги предвидете опасностите во сообраќајот и навремено да реагирате. Оваа е посебно важно кога возите во близина на училиште или градинка.
- Во близина на училиште или градинка внимателно одберете каде ќе го паркирате вашето возило. Паркирањето на тротоар или пешачки премин го попречува движењето на децата и ги насочува децата кон улицата и коловозот и на тој начин Вие всушност ја загрозувате нивната безбедност во сообраќајот. Исто така неправилното паркирање ги прави децата невидливи помеѓу возилата и нивното излегување на улица го прави крајно опасно.
Внимавајте на децата во сообраќајот и грижете се за нивната безбедност затоа што децата се само деца!