Како дел од сеопфатните кампањи за едукација и превенција на РСБСП, во Кавадарци се реализираше превентивно-едукативна активност насочена кон мотоциклисти, велосипедисти и корисници на електрични тротинети, во рамки на кампањите „Безбедно на мотор“ и „Заврти на сигурно“, кои се наменети за зголемување на сообраќајната свест за безбедноста на овие ранливи категории учесници во сообраќајот.
Активноста беше организирана од Републичкиот совет за безбедност на сообраќајот на патиштата (РСБСП) и Општинскиот совет за безбедност на сообраќајот на патиштата (ОСБСП) Кавадарци, во соработка со полициското Одделение за безбедност на патниот сообраќај при ОВР Кавадарци.
На учесниците во сообраќајот им беа поделени едукативни материјали со пораки за важноста од носење заштитен шлем на главата, како клучна мерка за зачувување на животот и намалување на последиците при евентуални незгоди. Возачите кои беа затекнати без заштитна кацига беа опоменати од полициските службеници и посоветувани од претставниците на РСБСП и ОСБСП за значењето на почитувањето на правилата и прописите со цел заштитата на сопствената безбедност во сообраќајот.
Со ваквите активности, РСБСП и ОСБСП продолжуваат со континуираната едукација и унапредување на културата на безбедно учество во сообраќајот, со цел намалување на бројот на сообраќајни несреќи и потенцијални тешки повреди кај ранливите категории учесници во сообраќајот.
Вози одговорно – носи кацига! За човечкото тело нема резервни делови.
