Во пресрет на викендот, во Охрид беше одржано сообраќајно-едукативното натпреварување за млади велосипедисти „Детски семафор Охрид“, настан кој има за цел подигнување на сообраќајната култура и едукација на најмладите учесници во сообраќајот. Натпреварувањето беше организирано од Општинскиот совет за безбедност на сообраќајот на патиштата Охрид, во соработка со Републичкиот совет за безбедност на сообраќајот на патиштата (РСБСП), Отсекот за превенција при СВР Охрид и Општина Охрид.
Во рамки на настанот, учениците имаа можност да ги покажат своите знаења и вештини од областа на сообраќајот преку теоретски и практични дисциплини, а најдобрите натпреварувачи беа соодветно наградени. Доделени беа награди за освоени први, втори и трети места во поединечна и екипна конкуренција, при што најуспешните учесници се стекнаа со признанија и вредни награди за постигнатите резултати.
Дополнително, во рамки на натпреварувањето се реализираше и ликовен конкурс на тема „Безбедно учество во сообраќајот“, на кој учениците преку креативен израз ја пренесоа пораката за одговорно однесување во сообраќајот. Најдобрите ликовни творби беа наградени, дел од истите ставени на аукција со цел собирање средства во хуманитарни цели, а дел од освоените награди на учениците им ги врачија присутните претставници на централната и локалната власт.
На настанот присуствуваа претседателот на РСБСП, Горан Ангеловски, градоначалникот на Општина Охрид, Кирил Пецаков, Началникот на СВР Охрид, директорот на Бирото за јавна безбедност, Александар Јанев – како и претставници на Советот и општинскиот ОСБСП, кои активно се вклучија во настанот давајќи поддршка за младите учесници.
Организаторите истакнаа дека „Детски семафор“ претставува важен сегмент во градењето на сообраќајната култура кај децата, со цел создавање одговорни и совесни учесници во сообраќајот уште од најрана возраст.
Со вакви активности се продолжува континуираната заложба на РСБСП и партнерите во кампањите со цел унапредување на безбедноста во сообраќајот и подигнување на јавната свест за значењето на почитувањето на сообраќајните правила и прописи.