Републичкиот совет за безбедност на сообраќајот на патиштата (РСБСП) и Мото клуб „Вепар“ од Скопје потпишаа Меморандум за соработка, со кој се уредуваат идните заеднички активности насочени кон унапредување на безбедноста во сообраќајот, со посебен акцент на мотоциклистите како ранлива категорија учесници.
Со Меморандумот се предвидува можност за реализација на низа теренски превентивно-едукативни активности, кампањи и настани, чија цел е подигнување на свеста кај мотоциклистите, но и кај останатите учесници во сообраќајот за почитување на правилата и заемна толеранција.
На средбата беше реафирмирана заедничката заложба за унапредување на безбедното учество на мотоциклистите во сообраќајот, како и потребата од континуирана едукација и информирање на јавноста за ризиците со кои се соочува оваа категорија учесници. Притоа, беше нагласено дека зголемената внимателност, одговорното однесување и меѓусебното почитување се клучни фактори за намалување на сообраќајните незгоди.
РСБСП и Мото клуб „Вепар“ ќе продолжат со заеднички активности кои ќе придонесат за создавање побезбедна сообраќајна култура и заштита на животите на сите учесници во сообраќајот.