Во текот на вчерашниот ден (12 јуни), во рамките на сеопфатните кампањи за унапредување на сообраќајната култура – „Сите сме пешаци“, „Безбедно на мотор“ и „Заврти на сигурно со велосипед и е-тротинет“, на булеварот „Партизански одреди“ во центарот на Скопје се одржа превентивно-едукативна активност.
Настанот беше организиран од страна на Републичкиот совет за безбедност на сообраќајот на патиштата (РСБСП), полициските службеници од СВР Скопје-Одделението за превенција при Министерството за внатрешни работи (МВР) и членови од Мото клубот „Вепар“ од Скопје.
Главната цел на настанот беше подигнување на свеста за одговорно и безбедно учество во сообраќајот, особено кај категориите учесници кои најчесто се изложени на ризици – пешаци, мотоциклисти, велосипедисти и корисници на електрични тротинети.
Минувачите имаа можност одблиску да се запознаат со мотоциклите на членовите од Мото клубот „Вепар“, да разговараат со искусни мотоциклисти и полициските службеници за правилата и прописите во сообраќајот, како и да добијат едукативен материјал со практични совети за безбедно движење по тротоарите, велосипедските патеки и патиштата. Дополнително, граѓаните добиваа флаери, маички и капи со едукативни тематски пораки, кои треба да ги потсетуваат на важноста од внимателно и одговорно однесување во сообраќајот.
Присутните претставници од РСБСП и МВР апелираа до сите учесници во сообраќајот, без разлика дали се зад воланот, на моторцикл, велосипед, на тротонет или пеш – дека безбедноста зависи од секој поединец. Воедно, потсетивме на важноста од почитување на правилата, носењето заштитна опрема и одговорното однесување во сообраќајот, со цел спречување на сообраќајни незгоди и зачувување на човечки животи.
Превентивно-едукативната активност наиде на позитивни реакции и прием од страна на граѓаните, кои покажаа голем интерес за пораките што се пренесуваа. Вакви активности како дел од заложбите на РСБСП за унапредување на сообраќајната безбедност ќе продолжат и во други градови низ државата, со цел создавање побезбедна и покултурна сообраќајна средина за сите учесници во сообраќајот.
