Во рамките на кампањата “Младост без лудост“, а во соработка со Арт Картинг Центарот, Републичкиот совет за безбедност на сообраќајот на патиштата организираше картинг трка за млади. На настан учествуваа повеќе од 50 натпреварувачи и голем дел јавни личности како Мартин и Стефан од Некст Тајм, фудбалерот на Вардар – Дарко Глишиќ, водителката Елена Стојановска и младиот македонски мотоциклист Христијан Бузалковски.
Настанот се одвиваше под мотот “Лудоста остави ја тука, младоста извози ја безбедно“ на која заеднички уште еднаш сите учесници испратија порака дека местото на брзото и агресивното возење не е на улиците и патиштата, туку на картинг патеките.
Младоста претставува темперамент, извор на енергија, вишок на адреналин, а целта на денешниот настан беше да се упати порака до младите вишокот на енергија да го остават на местата каде што тоа е дозволено, а во сообраќајот да учествуваат дисциплинирано, внимателно, одговорно и максимално да ги почитуваат сообраќајните правила и прописи.
Во рамките на настанот беа дистрибуирани голем број на едукативни материјали, а за најдобрите учесници следуваа награди.