Републичкиот совет за безбедност на сообраќајот на патиштата во соработка со МВР, општина Кавадарци и ОСБСП Кавадарци ја започна кампањата „Безбедно возење со трактор!“ 
Голем број на граѓани во Република Северна Македонија се занимаваат со земјоделие и согласно тоа голем број на возачи учествуваат во сообраќајот со трактори, мотокултиватори и други мобилни машини. Целта на кампањата е едукација и подигање на свеста кај возачите на трактори и други мобилни машини со цел нивно одговорно учество во сообраќајот, во прв ред едукација за потребата за управување на технички исправно возило.
За жал, состојбата на терен покажува дека голем број од возачите на трактори учествуваат во сообраќајот во ноќни услови и во услови на намалена видливост, а притоа нивното возило или приколката не се соодветно осветлени па многу често се случува токму тоа да биде причина за предизвикување на сообраќајни незгоди со загинати и тешко повредени лица. Водејќи се од таквата состојба, во рамките на оваа кампања, РСБСП заедно со МВР и другите партнери ќе реализираат голем број на превентивни активности во насока на подигање на свеста за потребата од поголемо односно соодветно осветлување на тракторите, приколките и другите мобилни машини кога учествуваат во сообраќајот. Кампањата, покрај директна едукација, предупредување од страна на сообраќајната полиција, ќе опфати и дистрибуција на ротациони светла, флуоросцентни траки за означување на возилото, налепници и други слични материјали со цел практично да можат да бидат презентирани придобивките од соодветно одбележување и осветлување на тракторите и мобилните машини.
Кампањата започна во Кавадарци, а ќе се реализира и во другите општини каде што има поголем број на земјоделци кои управуваат трактори, мотокултиватори и други мобилни машини.
“Свесни сме за проблемите со кои се соочуваат земјоделците, свесни сме за макотрпноста на земјоделската работа, но тоа не значи дека возачите на трактори може да учествуваат во сообраќајот неосветлени и со неисправно возило бидејки на тој начин го загрозуваат пред се сопствениот живот и сопственото здравје.
Важно е возачите на трактори и други мобилни машини да сватат дека управувањето на технички исправно возило е основен начин да го заштитат најпрвин сопствениот живот, животот на своите најблиски, а понатаму и животот на останатите учесници во сообраќајот.
Затоа апелирам до возачите на трактори, молтокултиватори и други мобилни машини, и покрај сите проблеми, во прв ред мислете на вашата безбедност, на вашиот живот, на вашето здравје, возете технички исправни возила, со исправни сопирачки и соодветно осветлени“ – изјави Претседателот на РСБСП, Гордана Кожуваровска по повод почетокот на кампањата „ Безбедно возење со трактор“.
Во прилог на кампањата, од РСБСП истакнуваат дека секоја година по неколку возачи на трактор и патници на трактор или приколка го губат животот во сообраќајни незгоди. Во првите 6 месеци, во 2020 година, 1 возач на трактор го загубил животот во сообраќајна незгода а 12 се повредени.
Во летните месеци, според неофицијалните податоци на РСБСП, најмалку уште двајца возачи на трактор го загубиле животот во сообраќајни незгоди.
Од РСБСП исто така потенцираат дека не се во прашање само возачите на трактори, тука се и патниците, т.е лицата кои се превезуваат на трактор или приколка а и останатите учесници во сообраќајот кои страдаат во сообраќајни незгоди во кои едно од возилата учесници во незгодата е трактор или приколка.
Така што може да се заклучи дека не е мал бројот на лица кои страдаат во сообраќајни незгоди во кои учествуваат трактори, мотокултиватори и други мобилни машини.