РСБСП ја продолжува традицијата на дарување детско седиште за во автомобил на првородените деца во новата 2026 година. Во првото утро од Новата година, претседателот на РСБСП, м-р Горан Ангеловски, заедно со претставници од Советот и од општинските ОСБСП, остварија традиционална посета на родилките и првородените деца во ЈЗУ „Клиника за гинекологија и акушерство“ во Скопје и ЈЗУ „Гинеколошка специјалистичка болница – Чаир“, како и на гинеколошките одделенија при болниците во Тетово, Прилеп, Битола, Охрид, Штип, Велес, Кавадарци, Куманово, Струмица и Радовиш.
Детските седишта како подарок ги чекаат и првородените деца ширум #Македонија, кои ќе бидат поделени во текот на деновите кои следуваат, а кога ќе биде родено првото бебе во 2026 година во другите градови од државата.
На родителите на новороденчињата им посакавме многу среќа, бериќет и здравје, со пригодни подароци и подарок – детско седиште, во рамки на активностите од новогодишната кампања. Посакавме Новата година и празниците да бидат потсетник дека „Секој живот е важен“ – со почитување на законските прописи и одговорно однесување во сообраќајот, секој поединец може да придонесе празничните денови да бидат исполнети со радост и среќа, а не со трагични последици.
Во рамките на „Новогодишната кампања“ на РСБСП, преку овој симболичен подарок, потсетуваме на важната улога што ја имаме во безбедноста на сообраќајот и на нашиот придонес кон унапредување на заедничката сообраќајна култура и свест.
