Теренските активности како дел од напорите на Републичкиот совет за безбедност на сообраќајот на патиштата во соработка со Отсекот за превенција при СВР Скопје, продолжуваат и во август – како дел на тековните кампањи „Безбедно на мотор – #НосиКацига “, „Безбедно на велосипед #ЗавртиНаСигурно“ и „Безбедно со тротинет“. Целта на активностите е подигнување на јавната свест и намалување на бројот на повредени лица кои управуваат со мотоцикл, велосипед или електричен тротинет.
Активностите беа реализирани на булеварот Партизански Одреди во Скопје, на потегот во Карпош 3 помеѓу Поликлиниката Букурешт и шеталиштето кај Т.Ц. Лептокарија, како една од најфрекфентните сообраќајници со велосипеди, е-тротинети и мотори во градот.
Во текот на акцијата беа дистрибуирани едукативни материјали, беа спроведени разговори со возачите и беа дадени практични совети за правилно и прописно учество во сообраќајот, заеднички со Одделението за превенција укажавме на опасноста од повредите кои настануваат од невнимателно управување со овие возила, како и одговорноста на секој поединец во почитување на Законската регулатива и носењето задолжителна заштитна опрема.
Преку овие сеопфатни превентивни кампањи, РСБСП и Министерството за внатрешни работи испраќаат јасна порака: безбедноста на најранливите учесници во сообраќајот е приоритет. Апелот до учесниците во сообраќајот е да внимаваат, да носат заштитна опрема, да се движат внимателно и одговорно, и да бидат пример во сообраќајот преку почитување на правилата и прописите.
РСБСП укажува: Сите заедно можеме да направиме улиците побезбедни!
