Месец Мај традиционално поминува во знакот на матурските вечери и големиот број прослави, веселби и забави кои се организираат по тој повод. Веселиот амбиент, изобилството алкохол, вишокот адреналин и желбата за докажување ги наведува матурантите на брзо и агресивно однесување во сообраќајот што често завршува со фатални последици.
РСБСП, на сите матуранти им ја честита матурата и апелира до нив да ја покажат својата матурата на дело на тој начин што ќе покажат дека се зрели, совесни и одговорни личности кои својата зрелост меѓудругото ја манифестираат и преку одговорно учество во сообраќајот што во основа значи не управување на моторно возило за време на прославата на матурските вечери. Управувањето на моторно возило за време на прославата на матурските вечери е спротивно на Законот за безбедност на сообраќајот на патиштата во делот кој се однесува на возачите почетници, а истовремено ризикот за предизвикување на сообраќајна незгода е исклучително висок.
Исто така, РСБСП апелира и до родителите секогаш да имаат на ум дека сообраќајните незгоди се случуваат секому, секаде и тоа кога најмалку очекувате. Младите, особено матурантите се ризична група учесници во сообраќајот која многу често страда во сообраќајни незгоди особено во периодот на прослава на матурските вечери. Затоа РСБСП уште еднаш потсетува дека само една грешка и еден момент на невнимание може да биде фатален а последиците ненадоместливи и апелира да не се дозволува матурантите да возат на матурската вечер, или пак да бидат возени од друг матурант. Постојат многу начини за да покажете колку го цените и почитувате нивниот момент, но користењето на семејниот автомобил, дефинитивно не е разумна одлука.
Согласно Законот за безбедност на сообраќајот на патиштата, во категоријата возач-почетник спаѓаат сите лица кои се стекнале со возачка дозвола во минатите 2 години. Возачите почетници немаат право да управуваат моторно возило во периодот од 23 часот навечер до 5 часот наутро, освен со придружба на возач постар од 25 години, на кој не му е изрекувана прекршочна санкција забрана за управување со моторно возило. Дозволено количество на алкохол во крвта е нула (0 промили) и немаат право да управуваат моторно возило чија моќност на моторот е поголема од 77 киловати.