Кога станува збор за безбедност во сообраќајот на патиштата, мораме да истакнеме дека тоа е општествена одговорност, во која сите ние, треба да дадеме свој придонес.
Токму затоа, РСБСП водеќи се од својата политика на отворени врати, пробува да ги инволвира сите општествени чинители во постигнувањето на оваа општествена цел, односно поголема безбедност на сообраќајот на патиштата во Република Македонија, а со тоа и намалување на бројот на загинати и повредени лица во сообраќајни незгоди.
По средбата со импортерите на моторни возила, денес РСБСП одржа средба со производителите на алкохол во Република Македонија.
На средбата се разговараше за формите и начините преку кои ќе се реализира понатамошната соработка и преку кои ќе се истакне потребата од одговорното конзумирање алкохол при управување со моторно возило.
Засилување на меѓусебната соработка, зголемување на корпорациската одговорност во подигнување на сообраќајната култура, како и засилување на интеркорпоративните активности на вработените со цел побезбедно учество во сообраќајот, беа само дел од предложените мерки преку кои ќе се работи на подигнување на јавната свест за одговорно учество во сообраќајот. Компаниите кои ќе ги имплементираат овие мерки, понатаму, треба да бидат позитивен пример, како за сите останати компании, така и за останатите учесници во сообраќајот.
На состанокот беа споменати и позитивните светски искуства, со цел да се пронајдат креативни начини за спроведување на овие цели.
Во текот на наредниот период, РСБСП и производителите на алкохол, ќе ја интензивираат меѓусебната соработка и преку заеднички активности и кампањи ќе се потрудат да придонесат за зголемување на безбедноста на сообраќајот на патиштата и за намалување на бројот на сообраќајни незгоди, предизвикани од возење во алкохолизирана состојба.