По повод одржувањето на XXXI Државен натпревар по прва помош, кој се одржа на 19 октомври 2025 година во организација на Црвениот крст на Република С.Македонија, Републичкиот совет за безбедност на сообраќајот, на покана од организаторот, зема учество преку свои претставници и беше почесен гостин на овој значаен настан.
Натпреварот, кој има длабока традиција и значајна едукативна и општествена улога, претставува важна можност за младите и возрасните учесници да ги демонстрираат своите знаења и вештини од областа на првата помош, кои се од непроценливо значење во секојдневниот живот и особено во сообраќајот.
Републичкиот совет за безбедност на сообраќајот ја истакнува својата поддршка за ваквите активности кои ја зајакнуваат културата на хуманост, одговорност и безбедност, и кои се во функција на превенција и зачувување на човечките животи.
Советот ќе продолжи активно да соработува со Црвениот крст и со други институции и организации во насока на промоција на безбедноста во сообраќајот и развој на свеста за значењето на првата помош како составен дел од безбедносната култура во општеството.
