Од 17 до 20 април 2024 год., во Златибор, Република Србија, се одржа 19-та меѓународна конференција „Безбедност на сообраќајот во локалната заедница“. На конференцијата присуствуваа над 350 учесници – стручњаци од областа на безбедноста во сообраќајот, претставници од државните органи, од локалната заедница и од други релевантни институции, со цел размена на искуства заради намалување на ризиците на патиштата и зголемување на безбедноста во сообраќајот.
Организатори на конференцијата беа факултети од Србија, Хрватска, Германија, Грција, Словенија, Босна и Херцеговина, агенции за безбедност на сообраќајот од Србија, БиХ и Словенија, како и министерства, здруженија за безбедност на сообраќајот, авто-мото сојузи и други институции од Република Србија.
На меѓународната конференција учествуваа и претставници на РСБСП, а м-р Гордана Кожуваровска, претседател на РСБСП, настапи со труд во тематската целина „Организација и управување со безбедноста во сообраќајот“.
На конференцијата посебно внимание беше посветено на примената на прописите за безбедност во сообраќајот, безбедноста на учесниците во сообраќајот, безбедноста на патната инфраструктура, безбедноста на возилата, како и на одржливата урбана мобилност и на работата на единиците на локалната самоуправа.