Претседателот на РСБСП м-р Гордана Кожуваровска учествуваше на конференцијата од областа на безбедноста во сообраќајот „Визија нула за Балканот“ која се одржа на 15 и 16 мај 2023 г., во Белград, Република Србија.
Конференцијата ја организираа Агенцијата за безбедност на сообраќајот на Република Србија и Меѓународната федерација за патишта (IRF Global), а на истата учествуваа над 300 стручњаци од областа на безбедноста во сообраќајот, високи претставници на меѓународни организации, претставници од агенциите и советите за безбедност на сообраќајот на патиштата од земјите од регионот, стручњаци од областа на транспортот и безбедноста во сообраќајот, како и компании кои претставија најнова технологија од областа на безбедноста во сообраќајот. Филип Вајерс, претседателот на Комитетот за безбедност на патиштата на IRF додели признание за Агенцијата за безбедност на сообраќајот на Република Србија.
Конференцијата „Визија нула за Балканот“ е дел од акцијата на Обединетите нации за безбедност на патиштата 2021-2030 година, и означува воспоставување на нови форми на меѓународна соработка со цел да се спречат континуираните повреди во сообраќајот чиј резултат се околу 1.350.000 смртни случаи годишно на светско ниво. „Визија нула“ е всушност пристап кој ги обединува напорите за признавање дека не е прифатлив ниту еден изгубен живот, па во таа насока се усогласувањата на активностите, размената на искуства и договорите за заеднички активности на огромен број релевантни институции кои со заеднички заложби ќе придонесат за унапредување на безбедноста во сообраќајот на патиштата и за намалување на бројот на повредени и загинати лица во сообраќајни незгоди.
