Во рамки на летната кампања на Републичкиот совет за безбедност на сообраќајот на патиштата (РСБСП) „Безбедно во лето – #ВозиОдморен“, денес на Граничниот премин Меџитлија – Битола се одржа превентивно-едукативна активност за подигање на свеста кај возачите за значењето на заморот при управување со возило во летниот период.
Активноста беше организирана од страна на РСБСП и Отсекот за превенција при СВР Битола во соработка со Општинскиот совет за безбедност на сообраќајот на патиштата Битола, а поддржано од
компанијата ОКТА и Автомотосојузот на Македонија (АМСМ) и медиумскиот покровител – Македонското радио. На граничниот премин на возачите и патниците им беа делени превентивно едукативни материјали (вода, капи, маички и автомобилски освежувачи – фрешери) со корисни препораки за безбедно патување, со цел да се поттикнат возачите на подолгите патувања да прават паузи од 15 минути на секои два часа возење, да возат одморени почитувајќи ги сообраќајните правила и прописи бидејќи заморот е една од почестите причини за случување сообраќајни незгоди со потешки последици во летниот период.
РСБСП и во наредниот период продолжува со засилени превентивно-едукативни активности со цел подобрување на состојбата со безбедноста во сообраќајот на патиштата.
