Дали да застанете или да намлите? Каде да се подзакриете во случај на сообраќаен метеж? И најважно – како да не одмогнете?
Гужвите и метежот во сообраќајот се фрустрирачки за многу возачи. Замислете како се чувствуваат возачите на Итната медицинска помош додека транспортираат пациент кој се бори за живот. Од тука, проблематиката, односно темата пропуштање на возилата со право на првенство на минување, во кои влегуваат возилата на службите за брза помош, полициските возила, возилата на противпожарните служби и возилата на Армијата на Република Македонија, заслужува посебно внимание.
Пропуштањето на возилата со право на првенство на минување кога со посебни уреди даваат светлосни и звучни знаци е законска, етичка и хумана обврска на секој учесник во сообраќајот. Согласно тоа, РСБСП со совети како да постапите, како одговорен возач, во случај да се најдете во ситуација да го делите сообраќајот со возилата со право на првенство на минување:
Прв чекор – лоцирајте го возилото!
Кога ќе слушнете сирена (звучни знаци), прво и основно – не треба да ве фати паника. Бидете смирени и обидете се да откриете од кој правец доаѓа звукот. Исклучете ја музиката и отворете го прозорецот. Логично, доколку се зголемува звукот значи дека возилото доаѓа кон вас, но, мора да утврдите дали доаѓа од зад вас, од напред или од страна.
Втор чекор – анализирајте ја состојбата!
Понекогаш се наоѓате во густ сообраќај без место за поместување. Тогаш, би требало да почнете да ја анализирате ситуацијата, штом ја чуете сирената. Вашата реакција зависи од многу фактори вклучувајќи ја одделеченоста на возилото со право на првенство на минување, брзината на приближувањето, однесувањето на другите возачи, типот на патот, можноста за безбедно отстранување на вашето возило итн.
На вас останува да ја донесете вистинската одлука во вистинскиот момент. Овде не е во прашање само законот. Со вашата реакција, можете да го спасите животот на некое дете, сестра, мајка, татко…
Трет чекор – изреагирајте!
Доколку се наоѓате на отворен пат без многу сообраќај, дозволете му на возилото со право на првенство на минување полесно да ве заобиколи, така што ќе ја намалите брзината и максимално ќе се поместите во десно. Доколку сообраќајот е густ, обидете се да најдете место да застанете на страна.
Но, кога станува збор за градските гужви, ситуацијата е неспоредливо покомплицирана. Универзален совет не постои. Тука мора да изреагирате во согласност со околностите.
Направете сѐ што е потребно да го пропуштите возилото со право на првенство на минување, а притоа да не се загрозите себе си или другите учесници во сообраќајот.
На автопат, само ослободете ја левата лента. Тоа ќе биде доволно.
Четврти чекор – гледајте го возачот и внимавајте на неговите сигнали!
Кога ќе се најдете во ситуација да не знаете како да изреагирате при средбата со возило со право на првенство на минување, воспоставете визуелен контакт со возачот и следете ги неговите упатства.
Што не треба да правите?
Без нагло кочење!
Кога ќе го забележите возилото со право на првенство на минување зад себе, најлошо што може да направите е ненадејно да закочите, што не ретко и се случува. Така ризикувате да предизвикате судар, а истовремено и да го забавите возилото со право на првенство на минување.
Без изненадувачки маневрирања!
Однесувајте се како во секоја друга ситуација во сообраќај – пуштете трепкач на време или вклучете ги сите четири трепкачи доколку планирате да застанете. Возачот на возилото со право на првенство на минување, ќе знае да го почитува навременото известување за вашите намери, што и да планирате да направите.
Не паничете! Паниката може само да ја влоши ситуацијата. Според тоа, кога ќе чуете сирени зад себе, длабоко вдишете и проценете ја ситуацијата. Доколку можете да помогнете да помине возилото со право на првенство на минување – направете го тоа, доколку не можете – останете смирени и чекајте прва можност да го направите тоа.
Не правете нов проблем!
Со целата своја волја, постои веројатност, во обидот да го пропуштите возилото со право на првенство на минување, да предизвикате сообраќајна незгода, па така наместо да помогнете, дополнително да ја искомплицирате ситуацијата. Затоа, обидете се, сѐ што преземате да биде апсолутно безбедно, па дури и ако тоа значи моментално забавување на возилото со право на првенство на минување .
На пример, автомобил стои на семафор со црвено светло, ненадејно зад него се појавува возило на Итна медицинска помош и ако возачот го фати паника, ќе помине на црвено и со тоа ќе предизвика сообраќајна незгода.
Исто така, доколку на отворен пат без место за застанување и можност за престигнување, почнете да возите многу брзо како би дошле до место на кое може да се поместите, постои можност да ја загрозите безбедноста во сообраќајот. Затоа, бидете внимателни.
И сантиметар значи!
Возачите на Итната медицинска помош се искусни и вешти „борци“ кои ќе знаат да го искористат секој сантиметар што ќе им го обезбедите со поместување на вашето возило. Доколку сте во можност да им го обезбедите тој сантиметар, направете го тоа. Сообраќајните ленти се доволно широко направени, така што со поместување на возилата од двете страни, би се обезбедила уште една лента на средина за возилата на Итната медицинска помош или на противпожарната служба.
ЗАПОМНЕТЕ: Возилата на службата за брза помош, на противпожарната служба, на полицијата и на Армијата на Република Македонија, кога со посебни уреди даваат светлосни и звучни знаци, имаат право на првенство на минување во однос на сите други возила освен во однос на возилата под придружба и возилата што се движат низ крстосница на која сообраќајот е регулиран со светлосни сообраќајни знаци или со знаци на униформиран полициски службеник, под услов да не ја загрозуваат безбедноста на другите учесници во сообраќајот.