На 11 ноември 2023 год. се реализираше настан „ДА ЈА ПОБЕДИМЕ СООБРАЌАЈНАТА НЕКУЛТУРА“ во рамки на проектот „Подигнување на јавната свест за важноста на културата во сообраќајот“. Носители на настанот беа: „Мотоцентар“, „Континентал“ и „Ист Гејт Мол“, во соработка со РСБСП, „Порше Клуб Македонија“ и МВР. Централниот настан се одвиваше пред Трговскиот центар „Ист Гејт Мол“ во Скопје, а во рамки на истиот имаше и дефиле на возила од „Порше Клуб Македонија“. 
Позитивното перцепирање на односите во сообраќајот, како и познавањето и почитувањето на законските правила и прописи, се основата на сообраќајната култура која треба да ја поседува секој учесник во сообраќајот без оглед дали станува збор за пешак, возач на моторно возило, патник, велосипедист, мотоциклист итн. За жал не можеме да речеме дека сообраќајната култура и етиката во сообраќајот се на задоволително ниво. Во РС Македонија, според податоците од МВР, во последните три години се намалува бројот на загинати лица во сообраќајни незгоди, но сè уште овој број е висок во однос на земјите од Европа.
Токму затоа, во рамките на своето делување РСБСП организира и спроведува низа едукативни активности, како обуки, продукција на материјали, настани и кампањи со што конкретно работиме на поголема едукација на сите учесници во сообраќајот. Дел од кампањите што ги реализираме се:
- зимска и летна кампања,
- кампања „Намали ја брзината – зголеми ја сообраќајната култура“
- кампања „И јас и ти – сите сме пешаци“
- кампања „Да ги заштитиме децата во сообраќајот“
- кампања „Не користи мобилен телефон додека возиш“ и други
Покрај тоа, во континуитет работиме и на истражувања и анализи, преку кои се лоцираат слабостите во безбедноста на сообраќајот на патиштата, но и можните начини за нивно надминување. Сепак, за поголема безбедност клучна е личната одговорност на секој учесник во сообраќајот. Затоа РСБСП ги поздравува ваквите иницијативи за подигнување на јавната свест за важноста на културата во сообраќајот и повикува за што повеќе иницијативи и давање придонес во заедничкото издигнување на безбедноста на сообраќајот на уште повисоко ниво
