Aктивности во рамки на кампањата „Носи кацига, вози безбедно“

Републичкиот совет за безбедност во сообраќајот на патиштата, во соработка со Локалниот младински совет и Полициската станица од Кочани на 30.06.2022година спроведоа активности во рамки на кампањата „Носи кацига, вози безбедно“, како дел од кампањата за подигање на сообраќајната култура кај моторциклистите, велосипедистите и лицата кои управуват електрични тротинети. Сите учесници во сообраќајот кои беа затекнати во централното градско подрачје, добија едукативен материјал и важни информации од вработените од МВР. Исто така претставниците на Локалниот младински совет делеа шишиња со вода како како освежување во овие топли летни денови.Претседателката на РСБСП, Гордана Кожуваровска истакна: ,,Заедно со Министерството за внатрешни работи и Факултетот за безбедност, сакаме да ги едуцираме велосипедистите и моторциклистите, меѓу кои голем број се млади лица, дека задолжително треба да ги почитуваат законските прописи и да носат заштитен шлем, односно кацига. Тоа значително ќе ја подигне нивната безбедност и ќе го намали бројот на жртви и тешко повредени. Исто така, неопходно е превозните средства, односно моторциклите и велосипедите да бидат соодветно обележани, а возачите на електрични тротинети да носат рефлектирачки елек од првиот самрак до разденувањето. Од она што го забележавме во Кочани е дека моторциклистите се подисциплинирани од велосипедистите, кај кои само неколкумина носеа соодветна заштита на главата''.
Кампањата „Носи кацига, вози безбедно“ е во тек и се реализира во повеќе градови во државата. Изминатата година ги дала првите видливи позитивни резултати, иако бројот од 11 моторциклисти, кои биле жртви во сообраќајни несреќи, е бројка која не е за потценување и факт е дека треба да продолжат ваквите кампањи  и активности се со единствена цел, сведување на таа бројка на минимум.