Претседателот на Републичкиот совет за безбедност на сообраќајот на патиштата, м-р Горан Ангеловски, учествуваше на „XV Меѓународна конференција за безбедност на сообраќајот во локалните заедници“, која се одржа во Бања Лука, Република Српска, во организација на Министерството за сообраќај и врски и Агенцијата за безбедност на сообраќајот на патиштата на Република Српска.
На конференцијата, која обедини бројни експерти, професори и професионалци од областа на безбедноста на сообраќајот, претседателот Ангеловски се претстави со свое излагање и презентација, при што ги запозна присутните со мисијата, визијата и активностите на РСБСП.
Во своето обраќање, тој ја нагласи важноста на превенцијата, едукацијата и меѓуинституционалната соработка како клучни фактори за унапредување на безбедноста на патиштата.
Ангеловски истакна дека соработката со меѓународните институции и организации претставува значајна основа за успешно и ефикасно работење на Советот, при што и во иднина РСБСП ќе продолжи со активности насочени кон размена на искуства, добри практики и реализација на заеднички проекти во оваа особено значајна општествена област.
На конференцијата, Републичкиот совет за безбедност на сообраќајот на патиштата доби Плакета за успешна соработка со Агенцијата за безбедност на сообраќајот на Република Српска и придонес во унапредувањето на безбедноста во сообраќајот. Ова признание претставува дополнителна мотивација РСБСП и понатаму да работи со уште поголема посветеност и одговорност во исполнувањето на својата мисија за создавање побезбедни патишта за сите учесници во сообраќајот.
